Туркий тилим
- Автор: Сапарбоев Наврўз
- Октябрь 15, 2020
- 519 кўрилди
#ona_tilim_faxrim
Туркий тилим
Лутфу забону зеварим -туркий тилим,
Мунисгинам, гаҳ музтарим -туркий тилим.
Ҳар уни -ю, ҳар наърасида ўзлигим,
Исо каби жонпарварим -туркий тилим.
Мулки башар тарихида давринг қадим,
Минг йилларидан сўйларим -туркий тилим.
Сен Ирқ тошин нақшида афсоналиғ,
Ёвқур элим, тожу сарим -туркий тилим.
Илдизларинг то Дашти Қипчоқдин келур,
Сосону Кушон, кишварим -туркий тилим.
Тўқсон ики қавм ичра барҳақ риштадир,
Ҳар қоракўзда жавҳарим -туркий тилим.
"Алчин", "ағир", "барлос"у "бурқут", "қўнғирот",
"Найман", "нукус"дек гавҳарим -туркий тилим.
Сен -Қошғарий, сен -Югнакий, сен -Яссавий,
Хоқониям, ҳам Қошғарим -туркий тилим.
Моварауннаҳру яна Афросиёб
Мулки каломи дилбарим -туркий тилим.
Лутфий, Атойи доғи Саккокий тили,
Абёти болу шаккарим -туркий тилим.
Сўз мулки султони Навоий лаҳжаси,
Лайлига элтар сарварим -туркий тилим.
Бобурки сендин кечмади то сўнгги дам,
Андуҳи сенда боварим -туркий тилим.
Булбул мақомига раво Мунис била
Огаҳидек шойистарим -туркий тилим.
Бир -бир десам, бўлмас адоси тарихин,
Давр устунига заргарим -туркий тилим.
Шоира сен бирла само рақсидадур,
Парвоз этарга шаҳпарим -туркий тилим.
Шоира Шамс
