Xotira va qadrlash kuni oldidan: SIZDAN KITOB OʻQISHNI OʻRGANAMIZ
- Автор: Сапарбоев Наврўз
- Май 07, 2022
- 409 кўрилди
Qalbi misli bolalardek begʻubor va samimiy ustoz Ollabergan Poʻlatovni yoʻqlab, uylariga borganimizda, "Oʻzbekcha- ruscha lugʻat" kitobini varaqlayotgan ekanlar. Nega, aynan lugʻat oʻqiyapsiz, deb soʻraganimizda, xotiramni mustahkamlayapman. Ilgari oʻqigan va yodlaganlarim esdan chiqmaganmikan, deya oʻzimni qayta-qayta sinamoqdaman, deb javob berdilar.
Ayrim insonlar butun umri davomida oʻqib-oʻrganadilar. Xotirasini yoʻqotmaslik, zehni va idrokini, aqli-shuurini yanada tetiklashtirish uchun kitob oʻqiydilar. Xalqimizning “Beshikdan qabrgacha ilm izla” degan goʻzal naqli bejiz aytilmaganligini ustoz hayotida koʻrdik. Ustoz kitob mutolaasi orqali yanada muhtasham boʻlishga, kitobni qadrlab, umrining mazmuniga aylantirishga harakat qilmoqdalar.
Bolalarning sevimli shoiri, taniqli jurnalist, Oʻzbekistonda xizmat koʻrsatgan madaniyat xodimi Ollabergan Poʻlatov bilan oʻsha kuni dildan suhbatlashdik. Oʻzbekiston Yozuvchilar uyushmasi viloyat boʻlimi rahbari, taniqli shoira Gavharjon Ibodullayeva ham, men ham savol-javobdan toʻxtamadik. Suhbatimiz juda maroqli oʻtdi. Ustoz ijodidan namunalar oʻqib berdilar. Nashrga tayyorlanayotgan yangi kitobining nazorat nusxasini qoʻliga olarkan, uni mehr bilan silab, xuddi yosh bolalardek, quvondilar.
Ollabergan Poʻlat sakson yoshdan oshgan boʻlsalar-da ijod qilib charchamayaptilar. Oʻzining koʻngil mulkini kitoblarda afzal bilayotgan ustozni koʻrib, xayajonimizni yashiraolmadik. Qadrli ustoz umringiz uzoq va samarali boʻlsin, ijoddan charchamang, sizga kuch-gʻayrat, muhtasham hayot tilaymiz! Har kun kitob oʻqishni Sizdan oʻrganamiz! Qadringiz hamisha baland boʻlsin!
Dilbar BEKCHANOVA, jurnalist
